الشيكولاته الساخنة، تُغريك لفترة من الوقت، تُعطيك الشعور بالدفء للحظات، وفجأة، تُشعل الحُمى فى جسدك بالكامل.. من أروع ما تم وصف الشيكولاته الساخنة به، هى الجملة اللى فاتت دى، واللى بيتم نسبتها للفرنسية Marie Marquise de Sévigné، هو فعلا توصيفها دقيق جدا لحالة الواحد وهو بيتناول كوبا دافئا من الشيكولاته الساخنة، خصوصا لما يبقى فى عز برد الشتاء!

الشيكولاته الساخنة، اتعرفت لأول مرة من خلال شعوب حضارة المايا فى أمريكا الوسطى، وده كان من حوالى 2500 – 3000 سنة فاتوا. وأصبح مشروب الكاكاو جزءًا أساسيًا من ثقافة الأزتك بحلول عام 1400 ميلادي. مشروب الهوت تشكوليت، أو الشيكولاته الساخنة، اتعرف فى دول أوروربا عن طريق أهل المكسيك الحديثة، واللى كانوا بالفعل غيروا بعض الشئ فى مكونات الوصفة الأصلية، ومن وقتها غزا مشروب الشيكولاته الساخنة العالم كله، واتعرف فى بلاد العالم بأسماء مختلفة، يعنى فى نيجيريا مثلا بيطلقوا عليه اسم "شاي الشيكولاته".. الهوت تشكوليت بقى من أهم المشروبات الساخنة اللى بيتم تقديمها فى المقاهى فى مصر، خصوصا فى فصل الشتاء. طريقة تحضير شيكولاته ساخنة (هوت تشكوليت) سهلة، بس محتاجة صبر، ومحتاجة نلتزم بالمكونات والمقادير بالظبط، عشان ناخد طعم أحلى من أى كافيه، لأنه غالبا اللى بتقدمه الكافيهات هو عبارة عن مشروب كاكاو باللبن، ومش بيتم استخدام الشيكولاته نهائى فيه، وطبعا عارفين ليه، عشان بيوفروا، لكن هو الحقيقة مشورب الشيكولاته الساخنة لازم يدخل فى مكوناته شيكولاته، وإلا يبقى ده تهريج بصراحة واحنا منقبلوش! تعالوا مع بعض نتعرف على طريقة تحضير شيكولاته ساخنة (هوت تشوكليت) ونستمتع بإحساس الدفا فى عز البرد.

طريقة تحضير شيكولاته ساخنة (هوت تشوكليت):

المكونات:

1/2 لتر حليب كامل الدسم

ملعقة طعام قرفة ناعمة

ملعقة شاى فانيليا (أو مستخلص الفانيليا)

2 ملعقة طعام كاكاو خام (يتم نخله قبل الاستخدام)

ملعقة طعام سكر أبيض

رشة ملح

رشة فلفل أحمر حار (حسب الرغبة)

100 جرام شيكولاته داكنة (تحتوى على 75% كاكاو خام)

للتزيين:

قطع مارشميلو

كريمة مخفوقة

شيكولاتة مبشورة

طريقة التحضير:

فى وعاء عميق مناسب، وعلى نار متوسطة – هادئة، نضع الحليب والقرفة والفانيليا، ونقوم بتقليب المكونات جيدا مع بعضها حتى تمتزج وتتجانس تماما.

نُضيف بعدها الكاكاو الخام للمكونات، ونُقلب جيدا حتى يمتزج الكاكاو مع باقي المكونات، ثم نَيف السُكر ورشة الملح، ونقلب المكونات مرة أخرى. فى هذه الخُطوة، يُمكن إضافة الفلفل الأحمر الحار لإعطاء مزيد من السخونة للمشروب (حسب الرغبة).

نُضيف مكعبات الشيكولاته الداكنة للوعاء المحتوى على المكونات السابقة، ونُقلب المكعبات جيدا، بهدوء، حتى يذوب تماما مع المكونات.

بعد فترة حوالى 10 دقائق على النار الهادئة ومع التقليب المستمر، يُصبح لدينا قوام لباني جميل لمشروب الشيكولاته الساخنة.

نرفع الوعاء من على النار، ونقوم بصب المشروب فى أكواب التقديم المُناسبة.

نقوم بتزيين أكواب الشيكولاته الساخنة باستخدام الكريمة المخفوقة، أو حبات من المارشميلو، والشيكولاته الداكنة المبشورة.

نحب نعرف من متابعينا رأيكم فى الوصفة خصوصا لو فعلا جربتوها فى البيت عندكم، وكمان نحب نعرف إيه أكتر المشاريب اللى بتحبوها فى فصل الشتاء. ولمتابعة الوصفة والخطوات بالتفصيل افتحوا رابط الفيديو ده ، وبالهنا.