طريقة تحضير أوريو آيس كريم



الآيس كريم حاجة ميختلفش عليها اتنين، الكل بيحبه صغير وكبير، وعالم الآيس كريم واسع وكبير، والصيف يعنى آيس كريم، ويا سلام لو كان فى عز الحر.. يبقى اتنقلنا معاه لإحساس السقعة اللذيذ ولو للحظات تجيب لنا شوية طراوة.

أنا بالنسبة لى الآيس كريم مرتبط بذكرى واضحة جدا فى دماغى، الآيس كريم = عملية اللوز، وأنا طفلة صغيرة أختى أميرة اللى أصغر منى تعبت والدكتور قال لازم تعمل عملية اللوز، وقتها كان أميرة عندها 4 سنين، وأنا كان عندى 7 سنين، اتخضيت عليها ومكنتش عارفة دى عملية سهلة والا صعبة، بس ماما طمنتنى وقالت لى إنها عملية سهلة، بعد العملية علطول، بدأت الناس تيجى تزور أختى، وبدأت علب الآيس كريم بكل أشكالها وأنواعها تملا الفريزر بتاعنا، وصلت لدرجة إننا مكناش لاقيين مكان فى الفريزر للعب من كترها، وبدأن نحطها فى التلاجة من تحت، وساحت طبعا وشربناها مش كلناها.. الجميل فى الموضوع، إن أميرة بعد العملية مكنتش قادرة حتى تاكل الآيس كريم، كنا نستعبط ونتمسكن وندخل نطمن عليها ونطلب منها إننا ناكل الآيس كريم بتاعها، وكانت كريمة معانا وبتوافق، م الآخر كلنا الآيس كريم بتاع عملية اللوز بتاعها كله ومسيبناش للبنت حاجة.. وحوش مش بنى آدمين احنا. يا ترى الآيس كريم مرتبط فى الذاكرة بتاعتكم بعملية اللوز زيى والا ليه ذكريات تانية؟!

 

صناعة الآيس كريم بيقولوا إنها بدأ تتعرف لأول مرة فى إيطاليا، كان فيها أشهر وأمهر صناع للآيس كريم وخصوصا آيس كريم الفانيليا، وفى القرن الـ18 بدأ صناع الآيس كريم الإيطاليين يهاجروا لألمانيا وهولندا، وبدأوا ينشروا طريقة صناعة الآيس كريم هناك، ومن وقتها بدأ الصناعة دى تنتشر فى العالم كله لحد ما الكل عرفها وأتقنها.. واحنا عشان عارفين إن أغلب الناس بتعشق الشيوكولاتة فى الحلويات، فضلنا إن أول وصفة لينا فى الآيس كريم المنزلي تكون وصفة فيها شيكولاتة، واخترنا لكم أوريو آيس كريم، عشان تستمتعوا بيها كبار وصغيرين، هى لذيذة لأن فيها قرمشة بسكويت الأوريو، يعنى طعم وسقوعية الآيس وقرمشة البسكويت، يعنى الجمال والإثارة.

 

المكونات:

 

10 حبة من بسكويت أوريو

250 جرام كريمة حلويات

1/4 علبة لبن مُكثَف مُحلى  Condensed Milk

1/2 ملعقة شاى مستخلص الفانيليا Vanilla extract

 

طريقة التحضير

 

فى كيس بلاستيك، نضع كمية بسكويت أوريو، ثم نغلق الكيس بإحكام، ونبدأ فى طحن البسكويت داخل الكيس باستخدام يد الهون، أو أى أداة تُساعد على طحن البسكويت. نراعى أى يطحن البسكويت بحيث يصير مفتتا.

فى طبق عميق، نضع الكريمة وبالمضرب الكهربى نقوم بضربها جيدا لمدة تقريبا 4 دقائق حتى تصبح متماسكة،

ثم نضيف إليها اللبن المكثف المُحلى ونُقلب المكونين مع بعضهما بالملعقة جيدا، حتى نحصل على قوام متماسك.

نقوم بخلط بسكويت أوريو الذى تم تفتيته مع الكريمة التى قمنا بإعدادها، ونُراعى أن يكون الخلط جيدا بحيث تشكل المكونات كتلة واحدة.

نضع الخليط فى علبة بلاستيك قابلة للوضع فى الفريزر، ونتركها بها طوال الليل حتى تتجمد، وبعد ذلك يصبح الآيس كريم جاهزا للتقديم.

يُمكن أن تختارى طرقا عديدة لتزيين الآيس كريم عند التقديم، مثل أن تضعى كمية من بسكويت أوريو المفتت على قمة الطبقات، أو أن تُضيفى صوص الشيكولاتة أو الكراميل عليه من أعلى، أو أن تزينيه بحبوب الشيكولاتة الجاهزة.

نحب نعرف من متابعى الصفحة إيه رأيكم فى وصفتنا النهاردة؟ ويا ترى تحبوا نعمل وصفات تانية لأنواع مختلفة من الآيس كريم؟ لو تحبوا اكتبوا لنا الوصفة اللى انتوا عايزنها.