مين فينا مبيحبش ياكل؟! استحالة مفيش.. طيب مين فينا بيحب ياكل بره البيت؟! يااااااه كلنا تقريبا J احنا أغلبنا رجالة وستات أطفال وكبار جربنا أكل المطاعم سواء الشعبية أو الكلاسيكية أو الأجنبية، فى كل مرة بناكل فيها بره البيت بنرجع معانا انطباع، الأكل ده جامد، أو بصراحة مكنش فى المستوى المطلوب.. لما الواحد بيخرج ياكل بره بيته بيبقى معتبر دى فسحة أو على الأقل نوع من التغيير وكسر الملل والروتين، أنا وأختى كنا تقريبا مدمنين على الأكل بره البيت، وكنا خاربينها الصراحة، الواحدة كانت تضرب لها طبق طعمه يطلع وهمى، تاخد حبوب الشجاعة وتفضل رايحة جاية على المطعم اللى اتبسطت فيها عمالة تاكل أو تطلب أوردر بالتليفون، وقولوا على الميزانية يا رحمن يا رحيم J

أنا بالنسبة لى وخصوصا فى الفترة الأخيرة بقيت محبش أكل بره، لاحظت إن الجودة قلت، والأسعار ارتفعت، والكميات المتقدمة نزلت للتلت.. قلت لأ كده مبدهاش، أنا لازم أبقى شملولة وأشوف إيه الأكلات اللى عجبتنى فى مطاعم بره، وأعملها أنا بإيديا واستمتع وفى نفس ذات الوقت أوفر فلوسى.

كل يوم نفسى تروح على حاجة أدخل أدور وأبحث عنها بالساعات على النت، كان بيواجهنى ساعات كتير مشكلة خصوصا مع الأكلات الأجنبية، إنى مش لاقية لها وصفة بالعربى، اتحديت نفسى ودخلت على مواقع لشيفات أجانب وذاكرت الوصفات يتاعتهم كويس، وقلت لنفسى أعمل حاجة تساعدنى وتساعد كل البنات والستات وحتى الرجالة المهتمة بالمطبخ إنهم يلاقوا الوصفة الأجنبية اللى بيحبوها مكتوبة بالعربى J

أنا مدمنة سلطة.. بحب السلطات بكل أنواع وألوانها وأشكالها، بشوف إنها فى أوقات كتير تصلح تكون وجبة مشبعة، وميزتها إنها بتتعمل بسرعة مش بتاخد وقت وتكلفتها غالبا بتكون بسيطة وقيمتها الغذائية بتكون عالية.

النهاردة هقدم لكم سلطة بحبها كتير، هى سلطة سيزر... السلطة دى بتتقدم بطرق كتير جدا ومكونات كتير جدا أحيانا، بس انا النهاردة اخترت لكم الشكل التقليدى بتاعها عشان كان له قصة وتاريخ حبيت أشاركه معاكم.

سلطة شهيرة ابتكرها الطباخ الإيطالي الجنسية المكسيكي المولد سيزر كارديني. هاجر سيزر كاردينى إلى الولايات المتحدة الأمريكية وأنشأ سلسلة من المطاعم بها. كان كارديني يعيش في سان دييغو ويعمل في تيجوانا حيث تجنب القيود المفروضة على الحظر.

قام سيزر كاردينى بابتكار هذه السلطة فى الرابع من يوليو عام 1924، عندما نفذت كل مكونات الغذاء الموجودة لديه فى المطعم؛ وقتها قام سيزر باستخدام ما لديه من مكونات بسيطة فى المطعم وأخرج لنا تلك السلطة الشهية المُسَمّاه على اسمه.

اشتهرت هذه السلطة في الولايات المتحدة و في العالم أجمع, وتميّزت بنكهة صلصتها المميزة بطعم زيت الزيتون وجبنة البارميزان.

طريقة عمل سلطة سيزر.

المكونات:

أولاً: مكونات السلطة.

·        قطعة كاملة من الخس البلدى، أو أى نوع آخر.

·        خبز فينو أو توست.

ثانياً: مكونات الصوص "Dressing".

·        3 ملاعق طعام من المايونيز.

·        4-5 ملاعق طعام من زيت الزيتون.

·        2 فص ثوم مفروم.

·        ملعقة شاى بقدونس مفروم.

·        1/2 ملعقة طعام عصير الليمون (الحامض).

·        جبنة بارميزان.

·        ملح + فلفل أسود مطحون.

طريقة التحضير:

يتم غسل الخس جيدًا بالماء والخل، ويجفف من الماء الزائد، ثم يقطع بالعرض فى صورة قطع متساوية الحجم وذلك بعد التخلص من رأس قطعة الخس.

يقطع الخبز الفينو أو التوست مكعبات متوسطة الحجم، ويتم تحميصه على نار متوسطة فى مقلاة باستخدام زيت الزيتون حتى تصل القطع للون الذهبى البنى.

تضاف قطع الخبز المحمص إلى قطع الخس، ثم يبدأ تحضير الصوص.

توضع كمية المايونيز فى وعاء ويضاف إليها زيت الزيتون والثوم وعصير الليمون، كما تضاف كذلك جبنة البارميزان، مع القليل من الملح والفلفل الأسود وتقلب جميع المكونات جيدا حتى يصبح الخليط متجانس.

يضاف الصوص إلى مكونات السلطة ويقلب معها ليعطى الطعم المطلوب، ويزين الطبق بالجبنة البارميزان المبشورة.

تقدم سلطة سيزر على موائد الغداء، كما أنها تعتبر وجبة عشاء شهية.