طريقة تحضير سلطة التبولة


تعرفوا إيه عن لُبنان؟! اوعوا تقولوا فيروز J

أنا اتولدت لاقيت نفسى بسمع فيروز.. حقيقى فعلا لأن أخويا الكبير كان علطول بيسمعها وهو بينام وهو بيصحى من النوم وهو بيذاكر وهو بياكل، فيروز All the time  فيروز All day long J

 

أنا اعتبرت نفسى محظوظة عشان ودانى اتربت على صوت فيروز، صوت ملائكى قوى وناعم، سهل ممتنع، ألحان عذبة جدا ورقيقة جدا جدا، كنت وما زلت وأنا بسمع أغانى وكلمات وألحان فيروز والرحبانية، بحس إنها من نفس الطبيعة اللبنانية، جمال خلاب وأشجار وجبال وتلج.

 

مفيش يوم بيعدى عليا من غير ما أدندن حاجة من أغانيها، ماما تقعد تتريق عليا وتقول لى "الحمد لله إن فيروز مبتسمعش غناكى ليها، كان زمانها ولعت فى نفسها" J مش عارفة ماما بتقولى كده ليه مع إنى والله صوتى حلو

 

لما اتعرفت على مجموعة أصدقاء من الشام ولبنان عرفت منهم حاجة غريبة، عرفت إنهم بيبتدوا يومهم بفيروز، هى أول شئ بيحصل لما بيصحوا الصبح، ومش بس كده، دول كمان بيسمعوا وهى بصحبة فنجان قهوة.. فيروز والقهوة بالنسبة لهم كيان واحد لبداية نهار جديد.

 

 

وطالما كلمتكم عن لُبنان والسيدة فيروز يبقى أكيد لازم أدخل معاكم المطبخ اللبنانى، ندخل كده برجلنا اليمين هناك ونشوف هنلاقى إيه؟! تبولة... واووووووو هى سلطة وفاتح شهية وحاجة كده ناعمة وقوية وكلها حنية J

التبولة سلطة شعبية مش بس فى لبنان، دى منتشرة جدا فى أغلب دول حوض البحر المتوسط، وبلاد الشام. سلطة التبولة اتنقلت لبلاد كتير زى تركيا وهناك غيروا شوية فى مكوناتها وبيسموها  kısır، أما فى قُبرص فبيسموا سلطة التبولة "تمبولى"  tambouli

التبولة ليها فوايد صحية كتيرة، وده سببه يرجع لمكوناتها، اللى هى بقدونس وزيت زيتون وبرغل وبصل وطماطم. تعالوا نتعرف على الفوايد الصحية لسلطة التبولة وبعدين نعرف بتتعمل ازاى.

 

فوائد سلطة التبولة:

غنية بفيتامين “C” والذي يساعد في مقاومة الأمراض و يحفز الجهاز المناعي في الجسم.

تحتوي على الألياف التي تقلل نسبة الكوليسترول الضار في الجسم.

مقاومة للإرهاق والتعب العام والإجهاد الكثير .

تقاوم مرض هشاشة العظام وتحافظ على صلابة العظام والأسنان وذلك لغناها بالكالسيوم .
تقوية البصر و الوقاية من العشى الليلي.

تعطي البشرة النضارة واللون الجميل وتحفظها من أشعة الشمس.

تحمي البشرة من الشيخوخة.

تساعد على تنظيف الجسم والكلى من الفضلات والسموم.

 

المكونات:

 

2 حزمة بقدونس مفروم

2 حبة طماطم مُقطعة مكعبات صغيرة

1/4 كوب عصير ليمون

2 عود بصل أخضر شرائح "إن وُجد" أو حبة بصل أبيض

أوراق نعناع مقطعة شرائح

ربع كوب بُرغُل

ربع كوب زيت زيتون

ملح، فلفل أسود

 

طريقة التحضير:

 

يتم غسل البقدونس غسلا جيدا بالماء الجارى، ثم يترك ليتخلص من الماء الزائد.

يُقطع البدونس فى شكل شرائح متناهية الصغر أو يتم فرمه فى الكبة.

تٌغسل أوراق النعناع جيدا وتقطع لأجزاء صغيرة جدا.

تغسل حبات الطماطم ويتم تفريغها من البذور ثم تقطع فى شكل مربعات صغيرة جدا.

يُغسل البرغل، ثم يُنقع فى ماء مغلى ويترك به لمدة نصف ساعة.

فى إناء عميق، يوضع البقدونس والبرغل والنعناع وقطع الطماطم وتُخلط جيدا مع بعضها البعض.

تُضاف كمية زيت الزيتون وعصير الليمون إلى المكونات.

تُضاف حوالى نصف ملعقة شاى من الملح على المكونات.

تُضاف ربع ملعقة شاى من الفلفل الأسود المطحون إلى المكونات.

تُخلط المكونات مرة أخرى مع بعضها وتُقدم السلطة.

يُراعى أن تكون كمية البقدونس أكثر ضعف أو ضعفين من كمية البرغل.