طريقة عمل شوربة غاسباتشو


الشوربة طبق رئيسى على سفرة الغدا فى أغلب بلدان العالم، وطبق رئيسى أحيانا كمان على سفرة العشاء، أول ما ييجى فصل الخريف تلاقى طبق الشوربة هو اللى بيتصدر مشهد الأكل فى كل مطابخ العالم، بتبدأ كل أسرة قبل ما تفكر فى أصناف الغدا اللى هتقدمها على سفرتها، تفكر فى صنف الشوربة اللى هيتعمل يومها عشان يدفى المعدة ويولد إحساس عام للإنسان بالدفا، خصوصا مع شدة برودة الجو حسب المكان اللى كل واحد عايش فيه، لكن الحقيقة الكلام ده لا ينطبق على وصفتنا النهارده، لأنها شوربة صيفية ساقعة، أيوه شوربة معمولة مخصوص عشان تتقدم فى فصل الصيف الحار، وتتقدم ساقعة ومعاها قطع تلج كمان، تخيلوا المنظر، هى شوربة جسباتشو الإسبانية، حاجة كده وهمية الجمال.

شوربة غاسباتشو الإسبانية موطنها طبعا إسبانيا، وهى شوربة بتتعمل من الخضار، يعنى من الطماطم والخيار والفلفل الأحمر الحار، وباقى المكونات اللى هنتعرف عليها سوا، بتتميز الشوربة دى بإنها سريعة التحضير، ومش بتحتاج لمرقة، ولا بتتطبخ على النار، شوربة جسباتشو الإسبانية بتبدأ طريقتها وتنتهي فى الخلاط، يعنى فى خمس دقايق يبقى معانا طبق شوربة صحي ومغذي وسريع التحضير، تعالوا بقى مع بعض نتعرف على مكونات شوربة غاسباتشو الإسبانية الصيفية الرائعة وطريقة تحضيرها.

طريقة عمل شوربة غاسباتشو

المكونات:

بصلة صغيرة

2 فصوص ثوم

3 ملعقة طعام زيت زيتون

حبة فلفل أخضر رومي

حبة فلفل أحمر رومي أو حار "حسب الرغبة"

6 حبات طماطم

قطعة خيار

قطعة حبز فينو مُحمص

ملعقة كبيرة خل الكريز " أو خل أبيض "

3 ملعقة كبيرة زيت الزيتون البكر

ربع ملعقة صغيرة فلفل أسود مطحون

ملعقة ونصف صغيرة ملح

ملعقة صغيرة كمون مطحون

كوب ماء

4 مكعبات ثلج

 

طريقة التحضير:

تُغسل حبات الطماطم والخيار والفلفل الرومي بالماء الجار، وتُقطع على شكل مكعبات صغيرة متساوية الحجم.

يتم كذلك غسل حبة البصل وتقطيعها لمكعبات صغيرها.

نقوم باستخدام الخلاط، أو الكيتشين ماشين، حيث تُوضع جميع المكونات فى الخلاط، ونبدأ فى خلطها جيدا مع بعضها البعض، حتى تصبح ذات قوام متجانس.

نكسب الشوربة في طبق تقديم مناسب، ثم نعمل على تزيينها بقطع صغيرة من الطماطم والخيار والقليل من زيت الزيتون والخبز المحمص.

تقدم الشوربة في فصل الصيف بادرة، مع إمكانية إضافة قطع من الثلج على طبق التقديم.

 

إن شاء الله تكون الوصفة عجبتكم وتستمتعوا بطعمها المنعش الساقع اللذيذ. لو جربتوا الوصفة وعجبتكم، نزلوا لنا تطبيقكم ليها على صفحتنا الرسمية على الفيسبوك.