طريقة تحضير تاكو الدجاج


ساعات كتير بيجى للواحد(ة) مننا حالة كسل رهيب، يلاقى نفسه مش قادر يتحرك من مكانه، ولا حتى عاوز يجيب لنفسه كوباية ميه لو عطشان.. وَخم غريب أو يمكن ساعتها بيكون زهق من كل حاجة حتى من نفسنا. كتير مننا لما بتمسكه حالة الكسل دى دماغه بتروح لسكة واحدة بس، الأكل، والحاجة الوحيدة اللى بنكون قادرين ساعتها نعملها، إننا نمسك الموبايل ونطلب أكل دليفيرى وبكميات!

من حق كل مواطن إنه ياكل، مقلناش حاجة، بس مهم جدا إن الواحد(ة) يفكر كويس فى صحته اللى الأكل الدليفيرى بيسبب لها مشاكل، ومهم كمان نفكر فى الميزانية اللى لو خَرَّمِت يبقى على باقى الشهر يا رحمان يا رحيم، وهنعيش دور المتسولين.

 

ضرورى جدا فى حياتنا اليومين دول، يكون عندنا مبادئ فى علم الطهى والتقديم، رجالاً ونساءً، شباباً وبناتٍ، عشان مهما كان عندنا حد يخدمنا، ولو حتى كان موظف الدليفيرى فى أى مطعم، فاحنا أولى الناس بخدمة نفسنا، مهم كمان نعلم ولادنا وبناتنا المعنى ده، ونخليه راسخ فى أذهانهم، "احنا أولى الناس بخدمة نفسنا"!

أنا كنت بطلع تعبى مع الأكل الدليفيرى زيكوا، وكنت بحب جدا وصفات المطبخ المكسيكى، المبدعة، المشطشطة جدا، تلاقيها بتجبرك على الوقوع فى غرامها، حتى لو مكنتش من محبى الأكل الحار، وصفات المطبخ المكسيكى سريعة وسهلة التحضير، وتنفع جدا للرجالة عشان ينفذوها، وتنفع أوى للبنات والستات اللى لسه بيقولوا يا هادى فى المطبخ.

 

النهاردة هعمل معاكم أول وصفة مكسيكية لينا فى مدونة #جوا_الحلة، تاكوز.. والله وأنا بكتب الكلمة ريقى جرى!

التاكوز بترجع لأهل المكسيك، وعرفوها قبل دخول الأسبان ليهم، وهى بترجع للكلمة المفردة Taco واللى ليها معانى كتيرة ومن ضمنها #الحشوة. مع أوائل القرن الـ20، انتشرت التاكوز فى كل أنحاء أمريكا وكندا، وكان أول ظهور لوصفة التاكوز، فى كتاب الطهى بالولايات المتحدة الأمريكية، كانت سنة 1914، اللى اتوصفت فيها طريقة عمل التاكوز من خبز التورتيا المُحمص، واللى بيتم حشوها باللحم، أو الدجاج، أو حتى الجمبرى.

النهاردة هنعمل سو امعاكم تاكوز الدجاج ونستمتع بالطعم فى كل خطوة من خطوات إعداده وتحضيره.. يلا بينا

 

المكونات:

 

لصلصة بيكو ديجايو pico de gallo salsa

3 حبات طماطم مُقطعة مكعبات صغيرة

2 حبات فلفل أخضر حار منزوعة البذور ومُقطعة قطعا صغيرة

1/2 بصلة حمراء مُقطعة قطعا صغيرة

2 ملعقة طعام من الكزبرة الطازجة المفرومة

2 حبات عصير ليمون

ملح، فلفل أسود مطحون

2 ملعقة طعام زيت زيتون

لتوابل "بهارات" التاكو: Taco seasoning

1 ملعقة شاى ملح

1/2 ملعقة شاى فلفل أسود مطحون

1 ونصف ملعقة شاى كمون مطحون

1  ملعقة شاى فلفل أحمر حار (شطة ناعمة)

1/2 ملعقة شاى فلفل أحمر خشن (شطة خشنة)

1/4  ملعقة شاى بودرة ثوم

1/4 ملعقة شاى بودرة بصل

1/4 ملعقة شاى زعتر مجفف

1  ملعقة شاى بابريكا

للصلصة الوردية Rose sauce

2 ملعقة طعام مايونيز

1 ملعقة طعام صوص أحمر حار chili sauce

للحشوة:

1/2 كيلو صدور الدجاج المخلية

حزمة جرجير طازج

ملعقة طعام خل أبيض

ملعقة طعام صلصة شيلى الحارة chili sauce

ملعقة طعام زيت زيتون

2 ملعقة طعام جبنة شيدر مبشورة

خبز التورتيا

 

طريقة التحضير:

 

يتم تحضير صلصة بيكو ديجايو، وذلك بخلط مكونات الصلصة مع بعضها البعض، ثم إضافة الملح والفلفل الأسود المطحون، وعصير الليمون وزيت الزيتون، وتقليب المكونات جيدا حتى تكتسب جميع المكونات الطعم المطلوب.

تُوضع الصلصة جانبا ونبدأ فى تحضير الدجاج، حيث تُغسل شرائح صدور الدجاج جيدا بالماء والخل، وتشطف بعدها بالماء الجارى.

يتم تتبيل قطع الدجاج باستخدام بهارات التاكو، وذلك بخلط جميع مكوناتها جيدا مع بعضها البعض، ثم رشها على قطع صدور الدجاج من الوجهين.

 

تترك قطع صدور الدجاج لمدة ربع إلى نصف ساعة حتى تتشرب توابل التاكو جيدا.

فى مقلاة بها زيت نباتى تم تسخينه، نضع قطع صدور الدجاج المُتبلة لتحميرها، ويراعى التحمير على نار هادئة إلى متوسطة، مع تقليب القطع على الوجهين حتى تمام التسوية.

يتم استخراج الدجاج بعد تحميره وتركه حتى يبرد قليلا.

 

فى وعاء نظيف، نضع حزمة الجرجير الطازج بعد غسلها جيدا وتجفيفها من الماء الزائد، ثم نضيف إليها ملعقة الخل الأبيض، وملعقة صلصة الشيلى الحارة، وملعقة زيت الزيتون، ونُقلب قطع الجرجير جيدا فى الخليط حتى تكتسب الطعم المطلوب.

 

يتم إحضار قواقع خبز التورتيا (تُباع جاهزة فى المحلات الكبيرة)، ونضع بداخل كل قطعة خبز مجموعة من أوراق الجرجير المُتبلة، كأرضية للحشوة.

نضع بعد ذلك، قطعة من صدور الدجاج المحمر، ثم نغمرها بالجبنة الشيدر المبشورة.

 

نضع بعدها صلصة بيكو ديجايو pico de gallo على سطح الحشوة.

ثم نعمل على تحضير الصلصة الوردية، بخلط المايونيز مع الصلصة الحمراء الحارة جيدا، وبعدها نقوم بتزيين السطح الخارجى لأرغفة قواقع التورتيا المحشوة بهذه الصلصة وتُقدم.