طريقة تحضير مكرونة بالفاصوليا ببواقى مكرونة


خدنا كفريق عمل جوا الحلة مبادرة مهمة وهادفة جدا، هى مبادرة بايتاباقي لاستغلال بواقى الأكل وأى أكل بايت فى التلاجة، وباستمرار بنعرض موضوعات لأفكار تساعدكم فى استغلال بواقى الأكل وتحويلها لوصفة جديدة الكل فى البيت يحبها ويبقى فيه إقبال عليها، وده كله عشان يبقى لينا دور بناء فى تقليل هدر الطعام، ولتوفير جزء كبير من ميزانية البيت.

المكرونة عادة لما بتتعمل المفروض مش بيتبقى منها ولا فتفوتة، بتتخطف على السفرة، بس اللى حصل معايا إن عملت مكرونة مقصوصة بالصلصة الحمرا فى يوم على الغدا، والحقيقة اتبقى أكتر من نصها، مما أصابنى بالإحباط، بس على مين، فكرت ودورت على حل، قلت لازم أستفيد من المكرونة البايتة، وأحولها لشكل جديد مختلف وتبقى كأنها طبق بقدمه لأول مرة فى البيت، وكل اللى فى البيت كانوا عارفين إنها المكرونة بتاعت امبارح، حلوتها لمكرونة بالفاصوليا البيضا مع صوص الفاصوليا البيضا، والتهموها التهامًا على الغدا، ومتبقاش منها أى حاجة خالص.. قبل ما أقول لكم طريقة تحضير مكرونة بالفاصوليا ببواقى مكرونة، تعالوا نتعرف مع بعض على معلومات مفيدة عن المكرونة وتاريخها.

 

تاريخ نشأة المكرونة غير مؤكد تماما إن كان في اليابان أو الصين أو اليونان أو إيطاليا.. الباحثون وجدوا كتب يابانية تتكلم عن معكرونة صنعت من دقيق الأرز عام 3500 ق.م، كمان كان فى إشارات عن المكرونة في عدد من كتب الطهي الصينية متضمنه مع أنواع أخرى من الغذاء يرجع تريخها إلى العام 3000 ق.م، وفى ناس بتقول إن أول إشارة مكتوبة عن طعام المكرونة وردت في مخطوطة القدس في القرن الخامس قبل الميلاد. وكانت الكلمة المستخدمة هي إتريا – itriyah بمعنى "الشعرية الجافة"، في روايات تانية بتقول إن الرحال الإيطالي الشهير ماركو بولو عمل رحلة استكشافية إلى بلاد الشرق عام 1274  لمدة 24 عام رجع بعدها بعدة اكتشافات منها المكرونة، ومنها دخلت إلى إيطاليا التي تعتبر الآن من أشهر الدول لإنتاج المعكرونة وطهيها وأطلق اسم عاصمة المكرونة على روما العاصمة الإيطالية.

 

لو عاوزين تعرفوا معلومات أكتر عن المكرونة افتحوا الرابط ده

 

طريقة تحضير مكرونة بالفاصوليا ببواقى مكرونة:

 

المكونات:

مكرونة مطبوخة بالصلصة الحمراء

بصلة متوسطة مقطعة شرائح صغيرة

نصف كوب فاصوليا بيضاء معلبة

جزرة مقطعة مكعبات

كرفس مُقطع شرائح رفيعة

2 ملعقة طعام صلصة طماطم

1/4 لتر عصير طماطم

كوب مرقة لحم

ملح، فلفل أسود

1/4 كوب زيت زيتون

2 ملعقة طعام زبدة

جبنة بارميزان مبشورة (للتزيين – حسب الرغبة)

 

طريقة التحضير.

فى مقلاة عميقة نضع زيت الزيتون والزبدة، ثم نضيف لها البصلة بعد تقطيعها لشرائح صغيرة جدا، ونُقلبها فى الزيت والزبدة لمدة دقيقتين ثم نُضيف الخضار (الجزر والكرفس)، ونُقلب المكونات جيدا لمدة دقيقتين، ثم نقوم بعدها بإضافة الفاصوليا البيضاء للخليط، ونُقلب مرة أخرى، ثم نُغلق الغطاء ونترك المكونات على نار هادئة جدا لمدة 3 دقائق.

بعد ذلك، نُضيف معجون الطماطم وعصير الطماطم للمكونات ونُقلبها جميعا جيدا مع بعضها البعض.

نضيف الملح والفلفل للمكونات ونقلبها جيدا، ثم نقوم بإضافة القليل من مرق اللحم ونقوم بتغطية الوعاء ونترك المكونات لمدة 5 دقائق لتتشرب من بعضها البعض.

نأخذ جزءاً من الخليط، ونضعه فى الكبة، أو الخلاط، ونقوم بضربه جيدا، حتى يُصبح ناعما ومتجانسا تماما.

نضع المكرونة مباشرة فى الوعاء المحتوي على الخضراوات، ونُضيف الصوص الذى قمنا بتجهيزه، ونقلب جميع المكونات جيدا.

نضع المكرونة فى طبق التقديم، ونزينها بالجبنة البارميزان وورق الريحان الطازج، وتُقدم.

يا رب تكون الوصفة عجبتكم، وتعتبر استغلال ممتاز لأى مكرونة بالصلصة الحمرا بايتة عندك فى التلاجة، والطعم خرافة ولذيذ جدا، أتمنى تكونوا استمتعتوا بيها، ومتنسوش تتابعوا باب بايتاباقي فى الويب سايت بتاعنا، وبالهنا.