طريقة تحضيرمكرونة بالصوص الأبيض


ازرعونى فى طبق مكرونة بالصوص الأبيض وسيبونا على انفراد لو سمحتم، هو فى جمال كده يا ناس فهمونى؛ الطليان دول شعب مُبدع جدا وفنان جدا، مش فى الأكل بس، ده فى كل لفنون تقريبا من زمان إلى الآن، مش هقول لكم زوروا متاحفهم وآثارهم، لكن هقول لكم إن تقريبا كل تصاميم السيارات العالمية وبالأخص مرسيدس وBMW عاملها فنانين إطاليين، وهقول لكم مفاجئة تانية، إن مدينة ميلانو مُصنفة من بين أكبر 5 مُدن للموضة على مستوى العالم، أظن من السهل بعد المعلومتين دول إنكم تتخيلوا معايا المطبخ الإيطالى بجماله وفنه وروعته وتميزه اللى بيخليه فعلا ملوش مثيل وسط مطابخ العالم كله، والكلام ده بينطبق بالحرف الواحد على وصفة المكرونة بالصوص الأبيض، وأخطر وأروع طعم للصوص الأبيض فى المطبخ الإيطالى، من وجهة نظرى، صوص ألفريدو، حاجة كده وهم الصراحة، جمال لا مثيل له، طعم جميل لدرجة مش ببقى عارفة الأكل اللى بيدوب فى فمى واللا أنا اللى بدوب فى الأكل!!

 

ستات وبنات ورجالة كتير فاكرين إن الصوص الأبيض هو بشاميل خفيف، وناس تانية فاهمة إنه عبارة عن كريمة الطهى اللى بتتباع جاهزة فى المحلات، يعنى نشتريها نحطها على المكرونة خلص الحوار وبقى عندنا مكرونة بالصوص الأبيض، أو نعمل بشاميل خفيف نزود فيها نسبة اللبن ونقلل نسبة الدقيق ونحطه على المكرونة ويبقى كده أنجزنا المهمة، الحقيقة كل ده هيطل عفى الآخر أكل، وهيتاكل طبعا، لكن مش هسيب أثر فى ذاكرة الواحد(ة) عن الصوص الأبيض، والأهم إنه هيبان عادى خصوصا للناس اللى بتحب الصوصات وبتفهم فيها كويس، عالم الصوص كبير كده ومتشعب بطريقة رهيبة، بس أنا اخترت لكم منه صوص ألفريدو لأنه مميز بطريقة كبيرة جدا فى طعمها، وده مش من فراغ، لأن داخل فى مكونات الجبنة البارميزان وفصوص الثوم، فطبيعى يبقى وهمى فى جماله، وده اللى هنعرفه سوا من خلال شرح الوصفة.

 

أول مرة أكلت فيها مكرونة بالصوص الأبيض كانت فى مطعم Spectra، كانت خروجة مع صديقتى داليا، صديقة الكلية، وقالت لى خدى على ذوقى مكرونة penne بالصوص الأبيض، وبالرغم من إنى أكلتى كانت ضعيفة جدا، والطبق كان مليان جدا، إلا إنى خلصته فى 5 دقايق، لدرجة إنى مكنتش لاحقة آخد نفسى وأنا بآكل، وعملت كمان حاجة غريبة جدا على إنى طلبت طبق كمان، صحيح مقدرتش أخلصه وأخدت الباقى تيك آواى على البيت، بس فى البيت التهمت الباقى بمعنى كلمة التهمت، للأسف آخر مرة رحت نفس المطعم كان من 3 سنين وقررت مروحش هناك تانى لأن تقريبا مبقاش له مستوى نهائى فى الأكل كله بصفة عامة وفى مختلف الأطباق، زعلت جدا على المستوى اللى نزل، بس اللى معوضنى إنى أستاذة فى المطبخ بدرجة شيف ونص.

 

المكرونة أو الباستا فى إيطاليا من أسباب شُهرة المطبخ الإيطالى فى العالم، ومش بتكون مجرد مكرونة فى مطبخهم لأ، دى كتاب كبير من الوصفات والطرق، غالبا المكرونة فى إيطاليا مش بتكون مكرونة كده مع نفسها، دى بيتحط لها إضافات كتير عشان تعمل قيمة كبيرة للطبق غذائيا وجماليا، هتلاقوا مكرونة بقطع الفراخ وبالمشروم، وبالجمبرى وبسمك الأنشوجة، هتلاقوا كمان مكرونة بالتونة، وبالخضار، وبالريحان والزعتر............ إلخ، عالم كبير وثرى جدا بالوصفات، وأنا كنت سعيدة الحظ غنى أكلت الوصلافات الإيطالية دى فى إيطاليا نفسها وده لما زرتها سنة 2015، استمتعت جدا بطبق المكرونة بالصوص الأحمر والجمبرى مع الجندوفلى، كان رهيب وياخد العقل، وكنت جعانة جدا لأنى كنت لسه نازلة من طيارة الوصول من القاهرة إلى ميلانو، وأنجزت الطبق ده فى 5 دقايق بس! تعالوا نعمل سوا النهاردة مكرونة فيتوتشينى بالصوص الأبيض مع قطع الفراخ والمشروم.

 

المكونات:

350 – 400 جرام مكرونة (أى شكل وأى نوع)

2 قطعة صدور دجاج مخلى

10 حبات مشروم طازج (عش الغُراب)

200 جرام جبنة بارميزان مبشورة

1/2 كوب من الزبدة الذائبة

2 مكعب من الجبنة الكريمى

2 كوب لبن

2 فص ثوم مفروم

1/4 ملعقة شاى ثوم بودرة

1/4 ملعقة شاى فلفل أسود مطحون

ملح "عندالحاجة"

زيت زيتون

 

طريقة تحضير مكرونة بالصوص الأبيض:

 

نبدأ بعملية سلق المكرونة، حيث توضع كمية مناسبة من الماء فى وعاء عميق، ونضع رشة ملح بسيطة (حوالى ربع ملعقة شاى من الملح)، على نار متوسطة وتترك حتى تصل لدرجة الغليان، ويُراعى عدم وضع أى نوع من أنواع الزيت فى ماء السلق، فالزيت يتسبب فى عمل طبقة عازلة على المكرونة، تمنع من تشرب الصوص عليه بشكل جيد، الملح وحده يكفى.

بعد غليان الماء، نقوم بتخفيض النار إلى هادئة ثم نُسقط المكرونة فى الوعاء، ويجب أن نقوم بتقليب المكرونة جيدا بواسطة ملعقة خشبية، أو أى ملعقة أخرى مناسبة، فالتقليب المستمر، هو ما يمنع التصاق حبات المكرونة، ويجب أن نراعى كذلك عدم تغطية الوعاء بعد إسقاط المكرونة فى الماء المغلى، لأن ذلك قد يُسبب التصاق المكرونة ببعضها (تعجن)، ومن الأمور المهم معرفتها فى طهى المكرونة، ألا نتركها فى ماء الغلى مدة طويلة حتى تصل للتسوية الكاملة، حيث يجب إخراج المكرونة قبل أن يتم وصولها للتسوية الكاملة، أى تكون بها (عضّة) واضحة عند التذوق، أو كما يقول أهل الصنعة من الإيطاليين Aldente، فالتسوية الكاملة فى ماء الغلى تًفسد الطعم. تستغرق هذه العملية من 8- 12 دقيقة.

أثناء تسوية المكرونة، نبدأ بتجهيز صوص ألفريدو، بوضع وعاء على نار متوسطة إلى هادئة، يُضاف إلى الوعاء الزبدة الذائبة، ثم يُضاف لها الجبنة الكريمى، وتقليبها بشكل مستمر باستخدام المضرب اليدوى، حتى تمتزج المكونات.

نبدأ فى إضافة اللبن بالتدريج إلى خليط الزبدة والجبنة الكريمى، حتى نحصل على القوام المطلوب، وهو القوام اللبانى. نُضيف 150 جم من الجبنة البارميزان إلى الخليط ونستمر بالتقليب. نقوم بإضافة الثوم المفروم والفلفل الأسود وبودرة الثوم إلى الخليط، مع الاستمرار فى التقليب.

فى مقلاة ساخنة، نُضيف زيت الزيتون، ثم نبدأ بوضع قطع المشروم بها، ونُضيف عليها رشة ملح وفلفل أسود، ونقوم بتشويح شرائح المشروم حتى تأخذ لونا داكنا بعض الشئ ثم نرفعها من المقلاة ونضعها جانبا.

فى نفس المقلاة نضع صدور الدجاج، بعد أن قمنا بتتبيلها بالملح والفلفل الأسود وتقطيعها فى صورة مكعبات متساوية، نقلبها على جميع الجهات حتى تصل للتسوية الكاملة.

بعد إعداد قطع المشروم وقطع الدجاج، وبعد الانتهاء من تجهيز صوص ألفريدو، نبدأ فى رفع المكرونة من حلة الماء، ثم نضعها مباشرة فى الوعاء الذى يحتوى على الصوص الأبيض، ثم نضيف قطع المشروم وقطع الدجاج ونُقلب جميع المكونات جيدا مع بعضها البعض حتى تمتزج كلها مع الصوص الأبيض، ونتركها على نار هادئة مدة لا تزيد عن 4 دقائق، ثم تُقدم ساخنة، ويُضاف إليها البقدونس المفروم للتزيين، أو ورق الريحان المُقطع فى صورة شرائح.

يمكن تقديم نفس الطبق من المكرونة بالصوص الأبيض ولكن مع الجمبرى، حيث نقوم بتسوية حبات الجمبرى فى مقلاة مناسبة مع القليل من الملح والفلفل الأسود وبودرة الثوم، ونقلب الجمبرى على وجهيه، حتى يأخذ اللن الوردى أو البرتقالى المعروف، ثم يُرفع الجمبرى من على النار ويُضاف إلى المكرونة والصوص الأبيض، ويُراعى جيدا أن تسوية الجمبرى لا تستغرق أكثر من 4 دقائق، 2 دقيقة لكل وجه من أوجه الجمبرى، لأن التسوية الزائدة تُحول الجمبرى إلى حبات مطاطية كالكاوتش يصعب مضغها.

 

دى كانت وصفتنا للمكرونة بالصوص الأبيض، أنا متأكدة إنها هتعجبكم جدا وهتصمموا تعملوها فى عزومات لأهلك وأصحابكم، بس متنسوش تتدعولى وتقولوا اتعلمنا الطريقة دى من مدونة جوا الحلة، وشاركونا صور المكرونات المختلفة اللى بتعملوا، وبالهنا.